Kum 1894 January ni 11-ah Mizoram-a Pioneer Missionary te Sap Upa (Rev EW. Savidge) leh Pu Buanga (Rev. J.H.Lorrain) ten Chanchin tha meichher chhi eng turin kan ram an lo thleng a. Aizawlah inkhuarin 'Pathian thu lo awih ve tawh rawh u tiin thu an hril chhova, ringtu an lo awm chhovin, kan hnam tana rotling thil tam tak an ti a. Amaherawh chu harsatna eng emaw avangin an ram lamah an hawng leh ta a. Tichuan, Baptist Missionary Society (BMS) tirhin kum 1903 March ni 8 ah Mizoram chhim lama rawngbawl turin Tlabung ah an lo lut leh ta a. Serkawn-ah awm hmun remin chanchin tha an hril a, ringtu an lo pungin, kohhran a lo ding a, a darh zel a, Zoram pumpui chu chanchin tha a lo thlen ațanga a kum 50-na (cham) 11.1.1944 ah chuan 'Kristian ram'ti a chhal theih khawpin kan lo awm ta a ni. Tichuan Mizoram Baptist Kohhran te pawh Serkawna inthlung khawmin rorelna inkhaidiat fel tak leh inawpna fel tak neiin kan lo kal chho ve zel a.

Kum 1971 a lo herchhuah meuh chuan inrelbawlna fel zawk a awm theih nan Pastor Bial inkalpawhna rem changte chu bial 3/4 te kaihkawpin Area Church Council siam nise tin Planning Commission rawtna chu Assembly-in a lo pawm ta a ni. Tuna ABC kan tih hi a tirah chuan Area Church Council (ACC) tih a ni thin a, kum 1981 ațang chuan Area Baptist Council (ABC) ti a thlak a lo ni ta a ni.

Keini Hnahthial Area huam chin tur pawh siam fel a lo ni ta a, Hnahthial Bial, Pangzawl Bial, Thingsai Bial te chu Area Church Council (ACC) pakhata awm turin ruahman fel a lo ni ta a, a hming atan Hnahthial Area Church Council tih a lo ni ta a ni.

BCM Headquaters General Secretary-in hriattirna a lo siam angin Hnahthial Area Church Council body siamna tur atan Rev. Khuala (Rev. Khualkunga) Hnahthial Bialtu chu Convener atan ruat a ni a. Dt. 25 September 1971 (Inrinni) ah Hnahthial Biak In (tuna BCM Bazar lo ni ta) ah ACC kal hmang tur leh hma lak zel dan tur sawihona te, Adhoc hruaitu tur thlanna nei turin Pastor Bial thum (3) Hnahthial, Pangzawl leh Thingsai Bial ațangin kohhran hruaitute inkoh khawm a ni a. He huna member kalte chu (minute bu-a a lan dan angin) a hnuaia mi te hi an ni e :